Teri ankhon me kai rang jhalate dekhe by Naqsh Lail pori

تیری آنکھوں میں کئی رنگ جھلکتے دیکھے

 

تیری آنکھوں میں کئی رنگ جھلکتے دیکھے

سادگی ہے کہ جھجھک ہے کہ حیا ہے کیا ہے

 

روح کی پیاس بجھا دی ہے تری قربت نے

تو کوئی جھیل ہے جھرنا ہے گھٹا ہے کیا ہے

 

نام ہونٹوں پہ ترا آئے تو راحت سی ملے

تو تسلی ہے دلاسہ ہے دعا ہے کیا ہے

 

ہوش میں لا کے مرے ہوش اڑانے والے

یہ ترا ناز ہے شوخی ہے ادا ہے کیا ہے

 

نقش لائل پوری