Mujhe kisi ne btaya khuda hai mere sath by Abdul Rehman Momin

مجھے کسی نے بتایا خدا ہے میرے ساتھ

مجھے کسی نے بتایا خدا ہے میرے ساتھ
میں کیا بتاؤں اسے اور کیا ہے میرے ساتھ

تجھے یقیں نہیں آئے گا پر حقیقت ہے
یہ تو نہیں ہے کوئی دوسرا ہے میرے ساتھ

یہ مشکلات بھی اب میرے ساتھ رہتی ہیں
یہ جانتی ہیں کہ مشکل کشا ہے میرے ساتھ

میں کیا بتاؤں تجھے یاد کیا دلاؤں تجھے
تو جانتا ہے جو تو نے کیا ہے میرے ساتھ

اگر وفا کو بتاؤں وفا بھی چیخ پڑے
وفا کے نام پہ جو کچھ ہوا ہے میرے ساتھ

ستم تو یہ ہے کہ میں نے اسے بھی چھوڑ دیا
جو سب کو چھوڑ کے تنہا کھڑا ہے میرے ساتھ

کسی سے کوئی شکایت نہیں مجھے مومنؔ
جو ہونا چاہیے وہ ہو رہا ہے میرے ساتھ