Anjan to na tha by Farooq

انجان تو نہ تھا

دِل کے معاملات سے ، انجان تو نہ تھا

اِسی گھر کا فرد تھا ، کوئی مہمان تو نہ تھا

 

بانہوں میں جب لیا اُسے ، نادان تھا ضرور

جب چھوڑ کر گیا مجھے ، نادان تو نہ تھا

 

کٹ تو گیا ھے ، کیسے کٹا یہ نہ پوچھیے ؟؟

یارو !! سفر حیات کا آسان تو نہ تھا

 

نیلام گھر بنایا نہیں اپنی ذات کو

کمزور اس قدر ، میرا ایمان تو نہ تھا

 

تھیں جن کے دَم سے رونقیں ، شہروں میں جا بسے

ورنہ ھمارا گاؤں ، یوں ویران تو نہ تھا

 

رسماً ھی آ کے پُوچھتا ، فاروق حالِ دل

کچھ اِس میں اُس کی ذات کا ، نقصان تو نہ تھا